27 ліпеня 2022 года а 17 гадзіне ў цэнтральнай выставачнай залі Віцебскага цэнтра сучаснага мастацтва адкрылася выстава работ выпускнікоў Мінскага дзяржаўнага мастацкага каледжа імя А.К. Глебава «3/4 стагоддзя», прысвечаная 75-годдзю каледжа.
3/4 стагоддзя – менавіта столькі часу прайшло з дня заснавання Мінскага дзяржаўнага мастацкага каледжа імя А.К. Глебава. За гэты час каледж набыў статус адной з вядучых устаноў сярэдняй спецыяльнай адукацыі мастацкага профілю краіны. Менавіта тут першыя ўрокі прафесійнага майстэрства атрымалі такія народныя мастакі Беларусі, як Міхаіл Савіцкі, Май Данцыг, Віктар Грамыка, Арлен Кашкурэвіч, Леанід Шчамялёў, Георгій Паплаўскі, Іван Міско, Васіль Шаранговіч. Сёння аб гэтых людзях напісаны манаграфіі, а іх творчыя набыцці сталі тэмамі навуковых даследванняў.Выстава «3/4 стагоддзя»
На выставе прадстаўлены больш за 50 твораў выпускнікоў каледжа. Гэта жывапіс, графіка, скульптура і дэкаратыўна-прыкладное мастацтва, якія адлюстроўваюць шырокі дыяпазон творчых манер, і кампазіцыйных схем, увагу да каляровай гамы, тону, прасторавай глыбіні, пластыкі і яскравай вобразнасці.
Маючы асабісты стыль, кожны выпускнік дэманструе асабістыя талент і ўнікальнасць. Работы мастакоў ілюструюць сувязь часоў, пераемнасць традыцый і ўзнікненне інавацый у беларускім выяўленчым мастацтве.