26 лютага а 14 гадзіне ў выставочнай зале на Белабародава, 5 адбылося адкрыццё выставы Надзеі Гутнікавай «Пашый мне, мацi, шнуравiцу», дзе прадстаўлена графіка і беларускі народны касцюм.
У назве выставы выкарыстаны словы народнай прыпеўкі, зафіксаванай вядомым мясцовым краязнаўцам Мікалаем Нікіфароўскім. Сёння яны з’яўляюцца прыкладам спрадвечнага жадання дзяўчат ў кожным новым пакаленні пацвердзіць сваю даросласць і прадэманстраваць красу ўласнага ўбору. Беларускае слова “шнуравіца” ўжывалася як агульная назва святочнага адзнення без рукавоў, якое шылася з самых каштоўных тканін і ўпрыгожвалася дадатковым дэкорам.
У экспазіцыі творчыя працы мастака, дызайнера швейных вырабаў і майстра па вырабу беларускага народнага касцюма, члена Беларускага саюза дызайнераў з 2015 года, Творчага саюза мастакоў Расіі з 2016 года, з 2019 года Еўразійскага Мастацкага Саюза і Беларускага саюза майстроў народнай творчасці Надзеі Гутнікавай.
Усяго прадстаўлена больш за 30 графічных твораў, 18 комплексаў народных строяў.
